بسم الله الرحمن الرحيم .
السلام عليكم .. حي الله التنكولوجيين وجيل النت 
اخباركم ان شاءالله تمام موضوعي يتكلم باختصار عن موقع من أكبر وأفضل مواقع الرفع واستضافة الملفات بالعالم .. وابتكلم عن عدة نقاط بالترتيب 
1- تعريف ونبذة عن الموقع 2- طريقة تحميل ورفع الملفات upload 3- طريقة تنزل الملفات download .. (المجاني والمدفوع) 4- طريقة الاشتراك المدفوع 5- طريقة التنزل المجاني بكسر حماية الموقع 6- طريقة البحث عن الملفات المرفوعة بالموقع
1- تعريف ونبذة عن الموقع
Rapidshare.com .. عبارة عن موقع استضافة ورفع للملفات يتيمز عن غيره من المواقع المشابهة أن كل جديد بعالم النت من برامج وأفلام وملفات من مختلف الأنواع تلقاها مرفوعة عليه أول بأول
الموقع يقبل رفع 100 ميقا بايت كحد أقصى للزوار و 2 قيقا للمشتركين.. والموقع يقبل تقسيم الملفات يعني لو تبي ترفع فلم وانت زائر بحجم 700 ميقا ممكن تقسم الفلم ببرنامج winrar او أي برنامج ل 7 ملفات كل ملف حجمه 100 ميقا وترفعها على الموقع
وبالنسبة للمدة الي تبقى فيها الملفات .. شهر اذا ماكان فيه أي طلب تنزيل للملف .. يعني الملف ممكن يقعد سنوااات اذا كان التنزيل عليه يتم لو على الاقل كل شهر مرة
الموقع ألماني الأصل .. وقبل اكثر من سنة بشوي كانت الملفات ترفع على الرابط rapidshare.de لكن من ذاك الوقت وقفوا الرفع على السيرفر هذا وتحول للسيرفر على الموقع الحالي rapidshare.com
من وجهة نظري .. الي عنده اشتراك بالموقع هذا بيغنيه عن كل المواقع البديلة وبينسى شي اسمه تورنت (بالنسبة للأفلام) وحتى برفع الملفات بيرتااااااح من تدوير مواقع الرفع والقلق
2- طريقة تحميل ورفع الملفات upload طريقة الرفع بالموقع هذا بغاية السهولة والجمال .. لأن الموقع موفر برنامج لأدارة الرفع والتنزيل بغاااية الروعة والراحة والرفاهية من المميزات الموجودة بالموقع انك تقدر تكون لك حساب وتحط فيه مجلد خاص لك ترفع فيه ملفاتك بشكل منظم ويصير فيه رابط خاص لمجلدك الي يدخل على الرابط يشوف كل الملفات الي انت رافعها بالمجلد والميزة الثانية .. وهي الميزة الي تخلي كثييير من الناس ترفع على الموقع هذا .. انك تفتح حساب لتجميع النقاط بحيث ترفع ملفات على حسابك هذا وأي شخص ينزل من ملفاتك الي انت رافعها تزود نقاط برصيدك .. بحال وصلت نقاطك 10 الاف نقطة .. يعطونك شهر مجانا وهكذا لكل 10 الاف نقطة .. والاجانب يجيبون النقاط هذي بكل سهولة خاصة الي يرفعون افلام وملفات كبيرة ملاحظة : عشان يحسب لك نقاط بالملفات الي انت رافعها .. لازم الي يحمل الملفات يحملها عن طريق التحميل المجاني موب المدفوع .. وهذي بصراحة اعتبرها سلبية من الموقع طريقة انشاء حساب لتجميع النقاط اول شي لازم ترفع أي ملف .. من واجهة الموقع تحصل شريط استعراض الملفات والرفع مثل الصورة
نختار ملف ونضغط على upload .. اذا خلص رفع الملف يفتح لك الصفحة الي فيها الرابط ومعلومات الملف المرفوع
تنزل اخر الصفحة تحصل نموذج فتح حساب تجميع .. مثل الصورة
تعبي البيانات الي تبيها .. اول خانة اسم المستخدم.. الثانية الايميل .. الثالثة والرابعة الرقم السري
اذا صارت معلوماتك تمام واسم المستخدم موب موجود عندهم قبل تطلع لك رسالة مثل الصورة هذي
طيب الحين نجي لرفع الملفات ... الموقع عندهم برنامج رووووعة لرفع وتنزيل الملفات رابط تنزيل البرنامج من هنا البرنامج يتطلب وجود NET 2.0 Framework بالجهاز .. والي ماعنده الشي هذا تطلع له رسالة خطا مثل هذي
الي تطلع له الرسالة هذي ينزل البرنامج من الرابط هذا بعد ماينتهي منزل البرنامج .. يفك الضغط عن الملفات .ويحصل ملف اسمه Seutp يضغط عليه وينصب البرنامج مثل أي برنامج ثاني طيب الحين اول مانفتح البرنامج تطلع لنا واجهة البرنامج الرئيسية .. نحصل فيها أربع خيارات بالشريط الي فوق Download , Upload , Account/configuration , Info نختار Upload وتطلع لنا الخيارات هذي مثل الصورة . .والشرح موجود بالصورة
عشان نرفع ملف .. نضغط على Add يفتح لنا اطار استعراض للملفات بجهازي .. اختار الملف الي ابي ارفعه بعدها يطلع لي الاطار هذا .. موضح عليه الشرح
بعد تحديد الملفات نضغط على Upload .. ويرجعنا للبرنامج الاساسي مثل الصورة الي قبل هذي طيب بعد مايخلص رفع الملف .. عشان احصل رابط الملف اذا بغيت احطه بموضوع او اعطيه أحد .. اضغط على الملف بزر الماوس يمين .. واختار من القائمة الطويلة خيار Show URLs يطلع لي اطار فيه الرابط .. واحصل فيه خيار copy txt to clipboard عشان ينسخ الرابط مباشرة وبكذا انتهت عملية شرح رفع الملفات .. وان شاءالله تكون الطريقة واضحة وسهلة .. والبرنامج بغاية السهولة بس يبيله واحد يجربه ويحوس فيه شوي
3- طريقة تنزل الملفات download .. (المجاني والمدفوع) اول شي طريقة تنزيل الملفات المجاني اذا فتحت رابط أي ملف مرفوع على الرابيد شير مثل الرابط هذا مثلا http://rapidshare.com/files/112062646/usenext_client.exe.html يفتح لي صفحة مثل الصورة 
نضغط على مربع Free .. وتطلع لنا الصفحة الثانية مثل الصورة
يطلع عداد وقت الانتظار .. بعد مايخلص تحت الصفحة الي بعدها مثل الصورة وموضح عليها الشرح
بالنسبة للحروف .. تطلع لك حروف كثيرة .. لاتكتب الا الي متشمعط فيها بسه (قطوه) مشكور ويزارد على التنبيه
وهذي اخر خطوة .. وخلاص يبدا تنزيل الملف المشكلة بالتنزيل المجاني انه علللله .. ولايخليك تنزل ملفات على راحتك .. يعني حاشرينك حشر عشان كذا قليل الناس تنزل من الموقع هذا تنزيل مجاني .. يعني انا لما حاولت انزل نفس الملف بعده ماسويت الطريقة مباشرة طلعت لي الرسالة هذي
يقول لازم تنتظر 98 دقيقة يعني وقت طوييييييل 
عشان كذا اما انك تستخدم برامج تكسر المحاية والتوقيت الزمني (وهذا الي بشرحه بالخطوة رقم 5) او الأحسن والاريح انك تشترك وتريح عمرك .. وهذا الي ابشرحه بالخطوة الي بعد هذي
عندنا الطريقة الثانية للتنزيل .. الي هي التنزيل للمشتركين Premium وهي عن طريق البرنامج الي شرحته قبل بخطوة الرفع
اول شي نفتح البرنامج .. ونروح لقائمة Account/configuration ونتبع الخطوات المشروحة بالصورة
بعد اضافة الحساب نحفظ التغييرات بالضغظ على Save .. ويرجعنا للواجهة البرنامج الأساسية عند قائمة Download
طيب انا افترض اني ابي احمل فلم او أي شي .. وعندي الروابط موجودة بملف نصي او من موقع
من قائمة البرنامج نضغط على Add .. ويطلع لنا الاطار مثل الصورة ومشروح فيها خطوات الاضافة
بعد مانضغط على Download .. يرجع بنا للصفحة الرئيسية للبرنامج بالشكل هذا .. وموضح عليها البيانات
والبيانات الي بالشريط الي فوق وضحتها قبل بشرح الرفع
وبكذا خلصنا من الخطوة هذي .. ننتقل للخطوة الي بعدها من الشرح
4- طريقة الاشتراك المدفوع
مميزات الاشتراك المدفوع :
1- تقدر تنزل أي ملف بدون حدود للوقت او عدد الملفات (المجاني ماتقدر تنزل اكثر من ملف وبعدها يوقفك فترة من الوقت مثل ماذكرت قبل)
2- يذكر بالموقع ان كمية التنزيل غير محدودة .. لكن الصحيح ا ن لك 5 قيقا كل يوم (وتعتبر بحرررر)
3- تقدر تستخدم برامج تسريع الداون لود .. مثل برنامجهم أو أي برنامج ثاني مثل IDM وغيره
4- تقدر تسوي ايقاف مؤقت للتنزيل .. وتستأنف بعدين بأي وقت
5- يعطيك مساحة كبيرة لرفع الملفات (كل ملف 2 قيقا .. المجاني كل ملف 100 ميقا ) كحد أقصى .. والملف يبقى للأبد (المجاني أكثر شي شهر اذا ماكان عليه داون لود مثل ماذكرت)
للاشتراك بالموقع عندنا طريقتين 1- اشتراك مباشر عن طريق الموقع .. للي يملكون حساب Paypal .. والي مايعرف وش يكون يروح للطريقة الثانية .. أو من تحويل بنكي عن طريق Wire Transfer الاشتراك المباشر من الموقع أرخص من الموزعين .. وهنا صفحة الاسعار والاشتراك http://rapidshare.com/premium.html
2- عن طريق الوكلاء الموزعين .. وتقدر تحصل الموزعيين الرسميين للموقع بالرابط هذا http://rapidshare.com/resellers.html بالنسبة لموزعين الدول العربية عندنا مصر والسعودية والكويت والمغرب .. بس بالنسبة للموزعين في السعودية في موقعين Name: Swahl Co. Website: http://www.swahl.com الموقع هذا انا جربته شخصيا .. بصراحة خدمتهم سريعة وجيدة وكثير يثنون عليه ويخدم سوريا بالنسبة للاشتراكات
بشكل عام ما اتوقع فيه فرق بين الموقعين بالخدمة ... والاسعار موحدة عن كل الموقعين
طريقة الاشتراك موضحة بكل موقع .. وانا بصراحة انصح فيه وبشدة .. وسعره رخيص مرررة
355 بالسنة .. ولاشي بصراحة بالنسبة للفايدة الي احصلها من الموقع
5- طريقة التنزل المجاني بكسر حماية الموقع
لقيت برنامج رهييييييييييب .. الصراحة انه فك أزمة .. صرت افكر اني ما اشترك بالرابيد شير عقب ماشفت البرنامج هذا اول شي بقولكم ان البرنامج حصلته من منتدى المشاغب .. وكاتب الموضوع العضو see_mido الله يعطيه العافية رابط التنزيل من هنا http://almobile.maktoob.com/org/uploads/c02662b5fd.rar اذا نزلت البرنامج .. تحصل ملف مضغوط .. فك الضغط عن الملف تحصل الملفات الموجودة فيه مثل الصورة 
اول شي نصب البرنامج بالضغط على الملف الي ايقونته حمراء بعد مايكتمل تنصيب البرنامج .. يفتح لك واجهة البرنامج .. سكر البرنامج واي نافذه تطلع معه .. وسكر البرنامج من تحت عند الساعة تحصل ايقونته نفس الشكل بعدين افتح مجلد patch .. وانسخ الملف الي موجود .. بعدها رح لمجلد البرنامج الي بالعادة يكون بالمسار هذا C:\Program Files\Rapidown والصق ملف الباتش هنا .. يطلع لك رسالة تأكيد استبدال للملف .. اضغط موافق .. وكذا خلاص سجلت البرنامج وصار كامل اخر حلاوة وعشان تتأكد ان البرنامج صار كامل .. افتح البرنامج .. ومن الشريط الي فوق اضغط على help .. بعدين اخر خيار register .. تطلع لك نافذة .. تحصل مكتوب تحت بخط اسود عريض software is registered طيب الحين نجي لشرح البرنامج .. البرنامج استعماله سهل مرة .. ولايحتاج قرق واجد << والقرق الي فوق وشو هذي واجهة البرنامج
مايحتاج تعرف وتبربس بالخيارات 
.. بس يبين لك معلومات عن الملفات وكذا مثل أي برنامج داون لود اول شي افتح البرنامج .. وخله شغال .. مو شرط تكون نافذة البرنامج موجودة .. اذا سكرت النافذة تحصل البرنامج موجود عند الساعة .. وكذا كافي بمجرد انك تنسخ رابط .. البرنامج مايصدق على الله ويطلع لك نافذة بوجهك مثل هذي
اضغط اوكي .. بعدها تطلع لك نافذة مثل هذي
شوفوا انا نزلت 3 ملفات من الرابيد شير بوقت واحد وبدون أي انتظار وبدون أي حركات نص كم بصراحة تعجبت من البرنامج مررررررة ماتوقعت ان فيه برنامج بالسهولة والقوة هذي للرابيد شير .. عز الله اني بسحب عليهم ولاني مجدد الاشتراك
6- طريقة البحث عن الملفات المرفوعة بالموقع
موقع الرابيد شير الرسمي مايقدم خدمة للبحث عن الملفات المرفوعة فيه .. وهذي بصراحة سلبية بالموقع
لكن فيه برامج ومواقع ومنتديات تكون معروفة انها تعتمد على الرابيد شير باغلب المواضيع الي فيها .. وابي اذكر الي اعرفه منها http://www.warez-bb.org/ هذا منتدى اغلب الملفات اي فيه مرفوعة على الرابيد شير المنتدى قد ماقول رهيب مايكفي .. الصراحة انا ماستخدم الا هو ولاعرف الا هو .. من ناحية الافلام والبرامج مادور غيره .. ينزلون كل جديد اول باول ويكفي انك تعرف ان المنتدى مواضيعه اكثر من 500 الف موضوع .. بصراحة منتدى على مستوى ونصيحة للي يبي ينزل فلم .. يدخل قسم الافلام بعدين يسوي بحث باسم الفلم من الشريط الي تحت .. تطلع لك مواضيع كثيرة عن الفلم (لأن ماعندهم شي اسمه مكرر يحذفونه – كل عضو له روابطه ونسخته الخاصة) .. انت اختر الفلم الي تشوف التعليقات يمدحونه ويمدحون النسخة (انا اشوف الموضوع الاكثر ردود وانزله)
بالنسبة لبرامج البحث .. ياليت محد يعتمد عليها ..لأن أكثر البرامج الي تحبث بالرابيد شير فيها ملفات تجسس او ملفات تسرق يوزرك اذا كنت مسجل خلك على المواقع احسن
ملاحظة : بذكر لكم الفرق بين الرابيدشير والتورنت .. طبعا الرابيدشير افضل بكثير لعدة امور 1- الافلام والبرامج الجديدة تنزل بروابط مباشرة اسرع من التورنت 2- نسخ الافلام الي تنزل تورنت مضمونة (خاصة بالمنتدى الي حطيته) .. والتورنت معروف فيه الغش بالاسامي والنصب 3- المشترك بالرابيدشير يحصل السرعة الكاملة بالتنزل (على حسب اتصاله) بعكس التورنت قليل تحصل ملفات تعطيك السرعة كاملة 4- الرابيدشير مايحتاج لعدد كبير من السيدرز عشان تكون السرعة معقولة .. يعني لو بتحمل فلم قديم او ملف قديم ماتبلش مثل التورنت 5- الرابيدشير تنزيل بدون رفع بعكس التورنت الي يشغل كل العمليتين .. وهذا بالتاكيد يخفف الضغط على الاتصال 6- الرابيدشير ماتحتاج معه فتح منفذ اتصال بالمودم مثل التورنت عن بعض المستخدمين لابد يفتح منافذ بالمودم عشان يقبل الاتصال (والشي هذا ممكن يخلي جهازك عرضة للتهكير واستغلال المنافذ هذي) ومختصر الكلام.. جرب وانت الحكم 
وبكذا انتهى الموضوع ولله الحمد .. واتمنى اني اكون وفقت بالشرح وأي استفسار وايضاح بالخدمة .. وان شاءالله اقدر افيدكم وللمعلومية ... كل ماذكر من اعدادي الشخصي وكتابتي .. والموضوع خاص بالبرنس .. والي يبي ينقل الموضوع ارجوا انه يذكر ان النقل من منتدى البرنس .. وموب شرط يقول اسم العضو الي هو انا 
05-15-2008, 11:58PM
![الصورة الرمزية !.[مشاكس الحب].!](http://www.albrens.com/vb/avatars/member21684.gif?dateline=1231432574)
