قصتي مع الهكر وجزاء الهياط ..!

جوانا · 01-05-2008, 10:09PM

بالخير كلكم ...
اولا مبروك عليكم تغيير اسماء الاقسام..تصدقون اني ضعت معد عرفت ادل..
لدرجة اني احترت وين امحط موضوعي فيه ..لدرجة اني بغيت احطه في المطبخ احسب انه بتاع الشسمه ..
فكني الله مير ماصرت اضحوكة لبعض الشامتين..<== كيف الحال وزرد

المهم ..
مادريتوا وش صار لي..

الله لايعيده ولايوريكم ماتكرهون ..

ذاك اليوم كنت فاتحة المسن وسااجة وخاشة جو مع قصيدة للشاعر فهد المساعد ..

جتني وحدة من البنات ماشية مليونين وخطمت علي وحاقت جوي.. وهي تلهث وتقول جوااانا جواانا النجدة ..

انا لبست لبس سبايدرومن حقي.. ونطيت قلت جوانا سبايدرومن بين يديك امري وش بغيتي ..

قالت : جوانا انا داخلتن على الله ثم عليك اني في وهقتن من امري ..تكفييييين تكفييين ساعديني لك ولا للذيب ..!

عاد انا قلت لها وبكل ثقة : لاطبعا للذيب قصدي يعني لي ..
وقمت اطبطب عليها وقلت : لاعليك انك في مأمن هنا .. وان شاءالله كل مشكلة لابد لها من حل .. بس وش مشكلتك ؟

قالت : شوفي انا هداني الله جتني اضافة من ايميل مدري وشو وقبلت ..
وقبل لاتكمل نطيت عليها وصفقتها قلت وشوله تقبلين ايميلات غريبة سااد حقك وماجاك..<== قبلي عجلة اصلحني الله

قالت : اصبري خن اقولك باقي السالفة ..خلاص قبلته وقضيت معد ينفع العتاب ..
قلت : ايوة اسلمي ..
قالت : المهم وقالي انه هكر وانه اخترق جهازي وشاف صوري تخيلي .. هل هو يقدر ولا لا؟؟
قلت لها : طيب هل انتي استقبلتي منه ملف؟
قالت : لا
قلت: طيب فتحتي رابط عطاك اياه ..!
قالت : لا
قلت : طيب فتحتي ايميل غريب هاليومين..!
قالت : لا

قلت : خلاص اجل روحي قولي له كل تبن .. ماتقدر ..
قالت : طيب يعني تهقين انه ينصب علي بيخوفني .. لاني مسحت كل صوري بس والله اني خايفة ..
وكاانت منفعلة تقول كلام ورى بعض لدرجة اني خفت عليها لاتنجلط ..
قلت لها : اها بس خليه عنك بس لاقيك يهايط عليك ..
او دوري انه بس مقلب من وحدة من البنات ..لان هالايام نجلاء تقول لي ودي اهبل باحد فيمكن انها هي..(نجلاء ذي خويتنا)
قالت: اجل تهقين انها نجلاء .. قلت ايه ايه يمكن ..
ومير تقول هين والله لاوريها شغلها ذالهيسة وتشيش وتقول والله ماخليها.. ثم تروح وتصد..

وارجع ثانية لقصيدتي وسجتي .. يوم دريت تجيني اضافة من ايميل غريب ..
رجعت لخويتي قلت : يام الشباب الايميل اللي اضافك هذا هو واحطه لها ..
قالت : ايييييه هذا هو والله ..وش دراك ..
قلت : لانو اضافني وشكلي بقرشعه منب قابلته ..
قالت : لاياحبي لك .. شكلها نجلاء اضيفيها خلينا نهبل فيها ونقلبه عليها تكفين..
قلت : طه ماطلبتي شي اصلا هذي لعبتي وخليها علي ..
ومير تفرح وتقعد تطاامر ..

المهم واجي اقبل الاضافة .. ويطلع لي توبيكه جيفارا وحاط صورة جيفارا ..
جتني خويتي قالت : اقول جوانا .. انا تو حظرته بعدين فكيت الحظر .. وقال لي تراني منيب نجلاء .. وانا ماجبت طاري نجلاء انتي قلتي له شي..!

قلت اصلا انا مابعد حاكيته خير شر ..ولاخذت كلام خويتي بمحمل الجد ..

وادرعم للايميل واجي اهاايط ..

قلت : هييييييه يام الشباب .. على مين تلعبينها ياحلوة ..

رد : قال هلا والله باللي مسوين اذكيا .. اجل تقولين ماقدر اخترق الا برقم الاي بي ..!
يا شطوره هندسة حاسب الي مو لعب .. العبي بعيد بس ..
وهذي صورة جهازك .. وحط لي رابط صورة ..

انا لحد الان موقنة انه نجلاء .. مدري ليه .. المهم جيت وفحصت الرابط بالكاسبر وطلع سليم ..
بعدين فتحته.. يوم فتحته ولاه لاهب صورة ولاهم يحزنون .. صفحة بيضا .. انا هنا اوجست في نفسي خيفة وقلت معقولة يطلع صادق ويصير هكر صدق ..
ويصير هذا باتش مغير صيغته للصورة..!
بعدين ابعدت هالافكار عن راسي وقلت لو كان باتش كان كشفه الكاسبر .. بس هذي نجلاء اعرفها ملكعة ..

المهم جيت وقلت بكل هيااط :
اقوول انتي وخشتك .. يالله اخترقيني اشوف انا انتظرك .. بروح اجيب شاهي واجي اطالع هندسة الخرطي يام الخرطي ..

بعدين قال : طيب طيب تو خويتك قااعدة تصيح والدور الحين عليك .. خليك بس تجين تترجيني انتم محد ينصحكم ..!

ومير اقوله : على تراااب بس .. آل اختراق آآل ..
وجلس يضحك ..وقال وربي لاتندمين ..

قلت : يوووووه تصدقين بديت انتفض .. يالله اشوف خلنيي اندم ..<== يابثري بعد

ثم قلت له : اقول ترى جيفارا موب مخترق انتي وذالخشة .. ولانك سبيكة ودي تحطين هذا بالحسبان ..
قال : ادري ..بس تعجبني شخصيته ..مابقى الا انتي تعلميني يالبزرة ..

قلت : سوقيها بس الله يرعااك ..
قال : روحي بس يوم انا بعمرك غلقت مجلدات شكسبير ..
قلت : ترفقي على عمرك بس .. انتي خطر بس يختارونك عضوة في وكالة ناسا .. من شدة ماتتمتعين به من نباهة ..
ثم قام يضحك ..

وقعد يقووول جوااااانا جوااااااانا هع هع
قلت : طيب دارية انك تعرفين اسمي وش الجديد يعني ..! ووه بس ياشينة على لسانك ..
ولا خويتي طالعة لي بمحادثة ثانية وتقول جوااانا جواناا عندك جوال فنووو ..
قلت : لها ايه ..

يوم دريت ويكلمني هذاك عالنافذة الثانية ويقول : اجل تدور جوال فنو خويتك ..!

انا طاارت عيووني شوي .. بعدين قلت اكيد ان هذي خطة مدبرة من صقيقاتي لاني دايم اسوي بهم مقالب فبينتقمون مني ..
واكيد ان خويتي ذي معهم ولا وشوله تسالني عن جوال فنو الا عشان تجي الثانية وتقول اجل تبي جوال فنو يعنني هكره؟ <== لاعمرك تفكرين بليز

قلت له : لا من يقوله موب صحيح ذالكلام ..يختي خطه غبية وقسم ..
ورحت لخويتي وقلت هين بس طابختها معهم يالنذلة .. ولاها ماترد علي ..

وبعدين رجعت للايميل هذاك وقلت : اقول ترى امور الاختراق والهكرجية كلها عندي وانا ام هندي .. ودك اخترق كمبيوترك..!<== ابو المهايط اللي كذا ياشيخة

قام يضحك وقال : ايه تكفين يالله ..عطيني اي ملف عندك وانا افتحه يا ام ايبي ..
قلت : اوك اصبري بس انتي شوي واوريك ..
قال: معقوله عندك علوم الهكر وللحين ما لقيتي الفايروس..يا شيخه روحي ازرعي بصل احسن لك..مالك ومال النت انتي..<== استفزازي
قلت : استني بس ارسل لك الباتش ..
قام يضحك وقال طيب بستنى ..

واروح سلمكم الله واجيب مقطع بلوتوث حجمه 230 وحطيت معه مفكرة مكتوب فيها تلايطي بس وحطيت عنوانه باتش بالانقلش ..<== تدبر عمرها
واحطه بملف مضغوط وارسله ..

قلت : استقبلي الملف ..
قال : طيب استقبلنا ..
قلت : طيب انتظري لحد مايتحمل وافتحيه اشوف .. واذا كنتي نجلاء او احد يعرفها انصحك لاتفتحينه لانه جد خطير باااتش قوي جدا ..بعدها راح يفتح لكل الهكرجية انهم يدخلون جهازك.. <== ماتعوق النصبة

قال : ابطلع اذكى منك واسوي اتصال عكسي عن طريق باتشك واوريك اللعب..قلت لك تعلمت النت بعمرك يا بزره<== لاحظوا اني خفيت به هنا خخخخخخ

قلت : ههههههههااااي آآل عكسي آآل ضحكتاااني ..لايكثر بس ..
قال: طيب والي خلقني وخلقك دامك مسويه قويه لا اخليك تندمين ..
قلت : خليني اندم اهوه .. والله انك من جنبها ولاتدرين من اين هي هابة ..
اجل تخترقين من غير اي بي .. تحسبينه لعب مبزرة ..!

وما دريت الا وهاللي يجي يقول تم تسجيل الدخول الى ايميلك من كمبيوتر اخر .. ويشووتني ..
انا هنا خفت وايقنت انه موب مقلب ولا شي وانه هكر فعلا .. وتجمد الدم بعروقي وايقنت اني هالكة لامحالة ..

يوم دريت تدق خويتي على جوالي وهي تبكي .. قالت جوووانا طلع هكر طلع صاادق ..
ياربييه شاف كل صوري ووراني اياها .. وقال انا رجال وفتح لي الكام ..
جواانا شكله مرررة يخووووووف ..ومعه سيقارة وكاس فيه شي يشبه الخمر بس مدري وشو..
قالت لي شسوي تكفيين حلييني ..
قلت اسكتي لاتقعدين تصيحين عندي مصيبتي موب اقل من مصيبتك .. الحين هو اخترق ايميلي وبدخل بجهاز ثاني اغير الباس ..
وبعدين انتي اقطعي الاتصال .. وادخلي من جهاز ثاني ..
قالت : ماعندي جهاز ثاني ..وبعدين شلون يخترق ايميلك وهو يقول انا فاعل خير بس شفت صور بجهازك وحبيت اعلمك تحذفينهم ..
قلت : فااعل خيير طل .. هذا انساان ساافل وحقيييييير ..

ويوم دريت راحت تكلمه وتقول له ليه تخترق ايميل البنت .. رد عليها وقال :
لاشوفي انتي ماراح اجيك ولا اسوي لك شي لانك حبوبة .. لكن خويتك ذالحقيرة اللي مسوية لي فيها ذكية .. حلفت اني لا اخليها تندم وتعتزل النت..!<<
وجت تترجااني وتقول تكفيييين لاتكبرين راااسك لاتعاندين ..

قلت : شوفي موب انا اللي اخضع له هو واشكاله السفلة .. انا اكبر من اني انزل نفسي لمستواه ..
اما على ايميلي او جهازي فيه الف طريقة وطريقة تبيد الحشرات السامة ..!

واطلع من جهازي واتصل بجهاز ثاني .. واغير باسووردات ايميلاتي وباسووردات عضوياتي في بعض المنتديات ..
وارجع لجهازي وافتح ايميل جديد واضيف فيه بعض البنات ..

قعدت افكر بشي اطلع منه هذا الشي اللي منلفز بجهازي ..بس انا الحين ماعرف هل هو بس ايميلي اللي قدر يخترقه ولا قدر يخترق الجهاز ..!
ونزلت مشكلتي باحد مواقع الامن والحماية .. وعطوني خطوات اسويها ..

المهم وانا قاعدة اسولف مع صديقتي قلت لازم اعرف هو مخترق جهازي ولا لا..!
جيت قلت لها اسمعي .. انا بكتب رقم جوالي هنا بالمحادثة .. قالت لااااااا يا مجنوونة يا متهووورة لاتكتبينه ..
قلت : ماعليك بس .. الجوال باسم خالي مو باسمي وبعدين وش بيسوي ..؟

بيدق علي مثلا ..خليه يدق فرصة نتعرف عليه خخخخخخخ ( وانا امزح طبعا )
وذي تترجااني ما اكتبه .. قلت ماعليك بس انا ناوية له على نية بس انتي اصبري شوية ..
وفعلا كتبته ..وكتبت : كااانك رجااال دق علي ..!

والله العظيم بعد شوي جوالي يدق والرقم غريب تخيلوا ..!!!!!!
ودق دقة وحدة وقطع ذالقعيطي خخخخخخخخخخ

انا هنا عرفت انه زارع بجهازي شي بحيث انه يشوف كل شي اكتبه واي ضغطة على الكيبورد حتى لو البرنت سكرن والكنترول ..
بس اللي اعرفه انه مايقدر يقرا الا اللي بالانقلش اما اللي بالعربي يجيه بالانقلش بس مقلووب ..
فقمت انا وصديقتي وقلبنا الكيبورد الى انقلش وقمنا نسبه بالعربي في المحادثة ههههههههههههههه ودعينا عليه جعلك للحمى المالطية يا متخلف يا سافل يا متسخ ..

ولا ابو الشباب يبربس في جهازي .. يوم دخلت مستنداتي لقيت وضعية المجلدات متغيرة ..

وانا ماودي افرمت الجهاز لاني لو بفرمته لازم افرمته على الزيرو.. وهو فيه ملفات مهمه احتاج لها وتحويشة عمر ..
وحتى لو حطيت ملفاتي بهارديسك خارجي برضو يبي له فحص لانو الباتش يمكن يكون مندس بينهم..

المهم وانزل موضوع في احد مواقع الحمااية اللي يقوم عليها ناس حريفين في الحماية .. ويعطوني خطوات وبرامج ولجلجة ..
الحلقة الاخيرة اني نظفت جهاازي وفلت ذالحشرة .. وطس من جهاازي جعله يتدربي في دزليب ..

والله ياجته دعااوي موب طبيعية الله يهديه بس ولا يااخذه .. وتسلط على الضعوف اللي زيي ..<<
والحمد الله قت سليمة ورجع لي جهازي الحبيب ...

يالله تحمدوا لي على سلامة جهازي وادعوا على ذالتبن جعله للريح اللي تهفه وتاخذه وتمسط به في الصومال..

مايستفاد من الموضوع :

1- اتركوا عنكم الهيااط عشان ما تروحون كشنة .. ولاعمركم تسوون روحكم ابو العريف ..
2- اوع تستقبلون اضافات غريبة ابدن قط بتاتا البتة .. ولو لاسمح الله استقبلتوا انتبهوا تفتحون رابط ولا تستقبلون ملف منه او حتى ملفات مشاركة ..
3- نداء من فتاة بريئة الى كل هكر ظالم .. ترى ربي يمهل ولايهمل ويجي لكم يووم ..
4- اذا انكبتوا يوما ما مثل نكبتي توكلوا على الله ورددوا حسبي الله ونعم الوكيل ..وربي بيكفيكم شرهم ..

!.البـ..البرنس..ـلوي.! · 01-05-2008, 10:44PM

ههههههههههههههههههههههههههههههههههههههههههههه
ههههههههههههههههه
هههههههههه
ههههه
ههه
هه
ه
تستاهلين يا ام كشه الحين وش لك بالهياط

لو علي اخترقت جهازك من زمان

بالنسبه للسالفه ذي صارت فيني
لكن سببت لي أزمه نفسيه

حيث اني كنت دايم اهايط مع أخوياني
وأسوي نفسي هكر وزحمه

وكل واحد يطالع فيني
واحد منهم قال برنس ابي توقيع منك >>> أبوك يالشهره شنب

الموهيم وقابلت مره واحد
على الماسنجر
ولا أدري من وين طلع لي
قال : أحم أحم يقولون أنك هكرز

قلت : من زمان >>> نصاب بس منتفخ راسي

قال : طيب علمني تكفى ابي اخترق ايميلات
قلت : والله مشوار بس خش على هالمنتدى يعلمك >>> ماجستير تصريف

قال : طيب مشكور بس عندي مقطع فديوا جديد يعجبك
قلت : هات يا قلبي <<<< على بالي مايا نصري

قال : ما تخاف ممكن ملف باتش واخترق أيميلك
قلت : هههههههه ضحكتاني لا يكثر وارسل
قال: هههههههههه والله ينخاف منك
قلت : ترسل ولا أخترقك >>>> والسعابيل مسويه أوديه في فمي

قال: يالحبيب توصي بشي والعب مع كبار ويالله ضف وجهك

شوي وقفل الماسنجر يلعن شكله لعب علي
وليلتي ليله ولا عرفت انام
وخش موقع وأحتك مع عالم وتعلمت
الهكر
من الألف ألى الياء حتى أني
في فتره من الفترات
يسموني اخوياني هكرز الغفله >>> يقطع شكلهم ما يحمسون الواحد

الموهيم وبعد ما اشبعت رغبتي
بالتعليم
رحت للي اخترقني
عن طريق ايميل جديد
وأضفته عندي
شوي دخلت عليه
قلت : أحم أحم يقولون أنك مصيبه بالهكرز
قال : من معي اصلا
قلت : طالب يبي يتعلم معك >>>ألا والله لطلع عيونك يالداشر

قال : ههههه اقول يلا ظف وجهك لا يطير الباسوورد بتاعك
قلت : طيب خذ هذي صورتك بتعجبك
قال : يا ربي لا يكون باتش
قلت : أيه واتحداك تلغيه

قال : يلا أرسل
قلت : طيب خذ >>فكرة الباتش انه صفحه مزروع فيها قنابل بريديه مجرد
ما يفتحها يتعبأ البريد ويرسل الى الجنك ميل كل الرسائل
وجنك الميل انا مبرمج الملف انه على حسابي
وبمجرد يروح ويضغط على حذف الرسائل
يصل لي الباسوورد
المهم بعد ما لعبت لعبتي

قلت : تذكر واحد أخترقته أسمه كذا وكذا
يسلم عليك ويقول يالله ظف وجهك

وسويت تسجيل خروج
الفوائد
1- لا احد يهايط وهو ما عنده خبره كاافيه في التهكير لأنتفه
2- رب ظارة نافعه

الزبده

أختي جوانا تعلمي على الهكر ليس بصعب
وردي بدال الصاع صاعين
شاكر طرحك الشيق
الجميل
المحزن

بنزل لكي ولخويتكي
فديوا كليب على حسابي

بعنوان نهاية مهايطيه

كوني بخير
البرنس

جوانا · 01-05-2008, 11:57PM

اقتباس:

تستاهلين يا ام كشه الحين وش لك بالهياط

شسوي بعد طبعون ألفناهو..

اقتباس:

لو علي اخترقت جهازك من زمان

يووومه..
تراي بديت احقد عليك..
هذا بدال ماتواسيني وتقول خطاك السو..

اقتباس:

بالنسبه للسالفه ذي صارت فيني
لكن سببت لي أزمه نفسيه

يعني منتب بعيد عني..

اقتباس:

قلت : من زمان >>> نصاب بس منتفخ راسي

ابووك يالهيط..
من زماان بعد..منتب عاقل..

اقتباس:

قلت : هات يا قلبي <<<< على بالي مايا نصري
قال : ما تخاف ممكن ملف باتش واخترق أيميلك
قلت : هههههههه ضحكتاني لا يكثر وارسل
قال: هههههههههه والله ينخاف منك

هههههههههههههههههههههههههههههه
ياشيخ رووووح..عالاقل انا ارحم منك اطقطق شوي ..
موب مثلك تدربي هالدميجة على غير سنع..
ولا وشوله تستقبل الملف يالسبهة..

اقتباس:

قلت : ترسل ولا أخترقك >>>> والسعابيل مسويه أوديه في فمي
قال: يالحبيب توصي بشي والعب مع كبار ويالله ضف وجهك
شوي وقفل الماسنجر يلعن شكله لعب علي

سااد تستاهل حقك وماجاك..هذي نهاية التميلح..

اقتباس:

وليلتي ليله ولا عرفت انام

نفس حالتي يوم اخترق جهازي..

اقتباس:

وخش موقع وأحتك مع عالم وتعلمت
الهكر
من الألف ألى الياء حتى أني
في فتره من الفترات
يسموني اخوياني هكرز الغفله >>> يقطع شكلهم ما يحمسون الواحد

موشاءالله عليك منتب تلعب..
انا حاولت اتعلم تعلم ذاتي وماقدرت فاحترمت نفسي وقضبت الجادة..

اقتباس:

قلت : أحم أحم يقولون أنك مصيبه بالهكرز
قال : من معي اصلا
قلت : طالب يبي يتعلم معك >>>ألا والله لطلع عيونك يالداشر
قال : ههههه اقول يلا ظف وجهك لا يطير الباسوورد بتاعك
قلت : طيب خذ هذي صورتك بتعجبك
قال : يا ربي لا يكون باتش
قلت : أيه واتحداك تلغيه
قال : يلا أرسل
قلت : طيب خذ >>فكرة الباتش انه صفحه مزروع فيها قنابل بريديه مجرد
ما يفتحها يتعبأ البريد ويرسل الى الجنك ميل كل الرسائل
وجنك الميل انا مبرمج الملف انه على حسابي
وبمجرد يروح ويضغط على حذف الرسائل
يصل لي الباسوورد
المهم بعد ما لعبت لعبتي
قلت : تذكر واحد أخترقته أسمه كذا وكذا
يسلم عليك ويقول يالله ظف وجهك
وسويت تسجيل خروج

اخس..
كفووو والله يالذييييييييييييب..
قسم انك شقردي ولعبتها صح..
وقدرت تاخذ حقك بيدك..

عقبااالي يااارب..

انا الحين رقم جواله عندي..وهو موبايلي وشكله بطاقة مدفوعة..
افكر انكبه بطريقة ما..

اقتباس:

1- لا احد يهايط وهو ما عنده خبره كاافيه في التهكير لأنتفه

طه..
خلاااص تووبة بصلاة امي وابوي معد اهايط..

اقتباس:

2- رب ظارة نافعه

وانا اشهد يالشقردي..قسم انك سنااايدي..

اقتباس:

أختي جوانا تعلمي على الهكر ليس بصعب
وردي بدال الصاع صاعين

ياليييتني اتعلم..خصوصا اني باشغال البرامج سريعة التعلم ولي نفس..بس الله يقويني اخذ حقي..

اقتباس:

شاكر طرحك الشيق
الجميل
المحزن

العفوو ومرورك اشيق واجمل واحزن..<<

اقتباس:

بنزل لكي ولخويتكي
فديوا كليب على حسابي
بعنوان نهاية مهايطيه

خخخخخخخخخخخ ولاتهون خشتك قبل لاتصبح بطل العالم في فنون التهكير..
اخوي برنس نورت انور ابو شي بالعالم..

لوحة إعلآنات ... { البرنس } ..