جيت احسب اللي راح واللي بقالي..
واكتشف انه سرق من نعالي..
احسن يوم..وافضل يوم..
وازين يوم..
الا وهو يوم تحط لي ابلة سحر ستكر على جبهتي....
والبنات يصفقن لي..
ايام موضة المريول المخصر..
جميلة أيام البزورة..بس حصة كانت أبزر من جميلة..لأن حصة كانت دائمة هوايتها العسكرة في المقصف..وما كانت تشجعنا باللعب الا هي..نعم..انها لعابة ...



ايام مبزرتي..كنت وحيدة ماما وبابا ..(<==بس فوقها بنت ما يعطونها وجه..عشان كذا صرت وحيدة ماما وبابا)..

احب ماما (<==بس علشان امها تعطيها حلاو بقر)..وأحب بابا(<==عشانه هو اللي يشتري الحلاو..هع)..واحب اختي الكبيرة(<==لولا الهوشات)..واحب أخواني الصغار(<==علشانهم دايما تتخذهم محرم"ابو 3 سنين")..

بعد كل هذا الحب والحنان المتدفق(سكري المتدفق..ولا فصلوة شركة الموية)..بعد كل هذا الحب..والحنية..واللحظات السماوية(<==شاكة..هي وردية ولا بنفسجية..قلت امسط سماوية)

في يوم من الايام وانا جالسة بين مامي & بابا..(<==لا تصدقون انها تناديهم تسذا..مغير يمة ويبة مالها رفيق)..
المهم..
الوالد مغير يتقهوى شاهي ويهوجس..واذا مر في هاجوسة يا سباكة ولا كهرباء قام يسأل الوالدة ..به شي خربان بالبيت؟(<==السعادة يجدها دائما هنا)..والوالدة:لا مافي شي خربان..لا تتعدى ارضك..ويكمل مشوار هواجيسة..اما البزارين..حظهم..فيه خيارات:
1-يجونكم اثنين يتهاوشون(لاتخافون..بعدين يتصالحون)..
2-ولا يلعبون بالكمبيوتر(ايام اول نستانس بالعب..نستمتع..اما الحين..المسٍألة أي مرحلة وصلت..ولا يجي بزرين يتناغرون :انا وصلت للمرحلة كذا..ولا الثاني يقول:لا انا وصلت قبلك لذي المرحلة..انت قديم!! )
3-ولا يجونك يتفرجون على سبايس تون(الله يخلي ابطال الدجيتال وبيدا بول)<==ذا الفلم كرتون الاغنية حقته رهيبة..سامرية لا تفوتكم..
4- اما في حالة عندكم حالات سمنة عند البزارين(من طقة اللي عندنا) تلقونهم يحوسون بالمطبخ..

نكمل الجلسة السعيدة..الام والاب..جلسة صفاء..وانا جالسة من بينهم..قاعدة احوس..ابي اشاركهم بالمواضيع..بس ما يعطوني وجه(<==بلا من الرجة)..فجأة..سكتوا..قلت هذي فرصتي واتكلم .. :
انا: اقول..
الجالسين بصوت واحد:خيييييييير؟؟؟(<==والله من النفس)..
انا: ..هاه؟...لا خلاص..ولا شي (<==ارتاعت)..

يكملون الجلسة..الاب يشرب قليلاً من فنجان القهوة..وقليلاً من فنجان الشاي..ويشخبط على كرتون المناديل(<==عادة)......رن الجرس..

هيييييييييي هيييييييييييي ......فسحة..فسحة..واللي نايم يصحى...لوووووووووووووووول..

يقلطون الغداء...ويترك الجميع اعمالهم الى بعد تناول الطعام..اخوتي يتواعدون في المخزن لاكمال هواشهم..وهاقد اتى اخي الصغير السبهة(<==نوع من اسلحة البيت علشان يقومونن من النوم..تراه يعرف يقوم صح..مع انه سبهه)..واتت اختي الفيلسوفة..وقد حلت جميع واجباتها المدرسية..وهي من النوع النظامي جداً..يعني تنام بكير..وتصحى بكير..وتشرب حليب قبل النوم وبعدة..وتحب ابلة سارة..
ياكلون اكلهم بكل هدوء..باستثناء لجة هواش المكان اللي يتوسط امي وابوي..(كل هذا حب)..
يقوم واحد من اخواني..معروف بالقرق والثرثرة والدندرة..ويتقعد لي اليوم (<==كل يوم يتقعد لواحد)..البقرة الضاحكة بتاكول كتير..البقرة الضاحكة بتاكول كتير..انا:أخرررررررررررس وإلا سوف ارميك في منزل أم عادل(<==التهديد حقنا J ) العلة:لااااااااا..انا اسف جدا..
البقرة الضاحكة بتاكول قليل(<==لا يا شيخ؟ترقع؟)..
أكيد انتم بتسألون..من هاذي أم عادل..انا بقولكم..هذي وحدة وهمية نهدد بها بزارينا..لا سووا شي نقول لهم:ترانا بنقول لأم عادل..بعدين يخافون....نقول عنها انها تسوي جميع انواع العذاب ..وانها تتلصص على جميع بزارين المملكة عن طريق اجهزة بيتها ان أي بيت تسمع ان فيه بزارين شياطين تشبك سلك بجهاز الستلايت ولا جهاز التلفون ..وتقوم تسمع وتشوف كلش..وتسمع اسم البزر..وتقوم على طول تتصل على البيت وتسوي دعاية بنفسها....وانها تاخذ البزر الشيطاني تقعده بيتها ايام واسابيع وشهور..على حسب مستوى الشطانة..وترجعه بعد هالمدة حليل ومؤدب..طبعا لازم تواعد بزارين مؤدبين يعرفون ذي العبة..علشان هم يقومون بدورهم يعلمون وش تسوي أم عادل بالضبط..وهم شلون طلعوا مؤدبين بسببها..والله ما عقل بزارين دارنا الا ام عادل الخرافيه..هع ..استخدموا هذي الفكرة..وعلمون بنتايجكم..اطلبوها الآن ..

أحم أحم..شكلي طلعت شوي (<==شوي وبس؟) على العموم..آسفة على الأطالة..شكلي طولت..وابغى الله لا يهينكم ملاحظاتكم..ولا تترددون على انكم تقولون رايكم بأول موضوع(<==تراها كتبت شليون موضوع ومسحته من كثر ماهي خايفة انه يفشل)..واذا فيه شي ما عجبكم بحاول أتحاشاة إن شاء الله في المواضيع الجاية..هع..
في أمان الله جميعاً..
أوخيتكم في الله..